منتديات عبق الياسمين - عرض مشاركة واحدة - قلم مبرى

#1 06-08-2019, 04:21 PM

من كتر برى القلم قلمى كده بقى بح
ياما شكيت و هريت لما صوتى ات بح
ناس سَمَعها تقيل و ناس طنشها تقيل
وناس من الاهمال فى المزبلة بتسبح

طب ليه سنون القلم م البرى حد السيف
خليها روح طيّبة و حنانها زى الطيف
اخدينها منك صفة بتخلّى خطى جميل
لكن الوديع لو قَلَبْ الصيف ح يبقى خريف

قَصْف القلم مُوتُه ، قَضِت عليه لِمواس
ولا حد فكّر مرّة إنه فى يوم ينباس
جومته ياما مَحِت أخطاء مايقصدهاش
واهم حاجة عنده جمال الخط أساس

مقصوف يا سن القلم هاتولى القلم جاف
وصفت ياما حروف م الحلق خرجت حاف
فرحت باللى انكتب والمعنى طبطب لى
لقيت لى م الكلمات سطور مابينها عجاف

برى القلم بقى غية لفرح إلهامى
كل ما احتاج افضفض ألاقى قدامى
حروف بترقص فرحة والغنوة عنابى
ألحانها خَشة القلب من فعل اقلامى

هبرى سن القلم و ادقق فى الخطوط
يمكن كلامى يوصل وتفهموا المخطوط
شِفرة حياتنا نعمة .. للمولى ننطقها
بقدرة التوحيد . خير ف الكتاب محطوط

قلمى سِنُّه انكسر قمت تانى ابريه
عشان اعبّر لكم ع اللى حوا لياليه
برّايتى حامية شويّة تانى راحت قاطماه
بريته تانى وتالت خنقتنى قمت راميه

عينى عليك يا قلم م البرى مابقتشى
تنحل ف بدنك عشم والخوف ماتكتبشى
عبير حروفك أمل و الكلمة موصوفة
دوا لناس .. العدم يوم ما تنكرشى

وبعد بری القلم
السن بقی قاتل
يغوص فی عمق الألم
وبيشفی ويقاتل
نلقی ال رفع العلم
مهزوم وبيخاتل

حلقات الاسبوع