حكاية من حكايات أمنا الغولة

كانت جدتي الله يرحمها بتحكي


" كان يا ما كان

يا سعد يا اكرام

ما يحلى الكلام الا بذكر النبي عليه الصلاه والسلام

كان في بنت جميله عايشه مع ابوها ومرات ابوها

وكانت مرات ابوها مكنتش بتحبها وكانت بتفضل بنتها عليها

علشان بنتها اوحش من البنت الجميله دي

كانت بتخليها تمسح وتكنس وتعمل كل حاجه وبنتها الوحشه مبتعملش حاجه


في يوم قالت الست دي للبنت الجميله روحي لامنا الغوله هاتي من عندها المنخول

قالتلها حاضر

راحت البنت الجميله لامنا الغوله

قالتلها امي بتقولك عايزين المنخول

قالتلها طيب تعالى

المنخول تحت اهوو

بس قبل متاخديه اغسليلي شعري وحميني

شعرها كان وحش اوي

هي كانت بتغسل وبتبص في مرايا جنبها على شعرها وتقول لامنا الغوله شعرك حلو يامنا الغوله

شعرك حلو يا امنا الغوله

وبعد مخلصت تسريح قالتها انزلي البير خدي المنخول

راحت امنا الغوله قالت للبير <<< يا بير املاها ذهب وحرير

يا بير املاها ياقوت يا بير املاها ماس

طلعت من البير كلها ذهب وحرير وجواهر

راحت لامها قالتلها المنخول اهو

قالتلها امها جيبتي الحاجات دي منين

قالتلها حصل كذا كذا

راحت قالت طيب واديت المنخول لبنتها الوحشه وقالتلها روحي لامنا الغوله اديهولها قالتلها حاضر


راحت البنت الوحشه قالت لامنا الغوله المنخول اهوو

امنا الغوله قالتلها اغسليلي شعري وسرحيلي

راحت البنت الوحشه بتغسلها شعرها

وقعدت تقول شعرك وحش يا امنا الغوله

شعرك وحش يا امنا الغوله

راحت امنا الغوله قالتلها انزل حطي المنخول في البير

وقالت للبير

يا بير املها صراصير

يا بير املاها تعباين وفئران

طلعت البت تجري راحت لامها امها اتغاظت

تاني يوم عرف امير من الشام ان في بنوته حلوه جميله

راح علشان يخطبها

وكان في قط صغير بيحب الجميله دي وعارفها وبيقعد معاها في وحدتها

راح الامير ووافقوا وخلاص

جيه يوم الفرح

راحت الست الوحشه زوقت بنتها وسابت الجميله العروسه واديت العريس بنتها ووشها متغطي

وسافر على الجمل بتاعه وهم ماشيين القط عرف انها مش البنت الجميله

والبنت الجميله بتعيط في البيت

راح عند العريس وقعد ينونو ويجري على مكان العروسه

راح الامير فكره بيلعب

شويه ينونو ويجري ينونو ويجري

لحد مراح الامير عند المكان اللي فيه العروسه بيفتح

لقاها البنت الوحشه

راح راجع تاني وقال للست انت اديتني بنت مش اللي انا عايزها

انت بتغشي

وكان هيقتلها راحت البنت الجميله قالتله لا متقتلهاش

حرام عليك ..... انا موجوده واحنا فكرناك بتتكلم على اختي دي

راح الامير قالها مش هقتلها علشان خاطرك تعالى معايا

وخدها وسافر للشام واتجوزا وخلفوا صبيان وبنات

وتوته توته فرغت الحدوته


هي قصة من تأليف الخيال طبعا لكن أكيد بعض البنوتات ما بيناموا اذا قرأوا هذه القصة



تحياتي