من الواقع المضحك

وانا في اولي اعدادي تقريبا والدي الله يرحمه كان مديني واجب تاريخ و طبعا بما اني ما بحبش المذاكره كنت بلعب طول الوقت و ما بحلش الواجب الا اخر ٥ دقايق قبل تسليمه 😀 سامع صوت باب الاوضه عند بابا بيتفتح و ابتدي يتحرك من اوضته و بحسبه بسيطه كده لتحركات ابويا داخل الشقه عند خروجه من الغرفه لوصوله للنقطه x اللي انا فيها مرورا بالحمام لغسل وشه و المطبخ لعمل كبايه قهوه تصبره علي ما ابتلاه بينا زي ما هو موضح بالمعادله دي (x^2+4)/(x-3) يبقي فاضلي ٥ دقايق !!😂 كنت شاطر في حل المعادلات دي فقط انما الواجب لا 😂، المهم مسكت الورقه و حليت اللي قدرت عليه بسرعه و متبقيلي كام سؤال مش عارف اهبد فيهم استعنت بصديق قصدي باحمد الشاب الثانوي انذاك 😂 طبعا يمني ساعتها كانت لايصه بالواجب بتاعها ماقدرش اجي ناحيتها 😂.
انا : احمد ، الفتح الاسلامي لمصر كان علي يد مين ؟
احمد بكل ثبات انفعالي: الشيخ سلامه الهندي 😂🙈
انا : متأكد يا احمد؟! انا عمري ما سمعت عنه في المدرسه ده
احمد : يا خبر ! ازاي؟
طبعا ماعنديش وقت للاسف ادور ورا احمد مع ان الشك هيموتني 😂
المهم ابويا جيه و بداء يصحح الواجب ، واجب ايه بقي ! يصحح التخلف ده 😂
تعابير وش ابويا بتتغير بالتدريج من النقطه ( أ ) الي النقطه ( ي )و ده منحني خطر جدا 😂، و عمال يشرب في القهوه الساده و يولع في سجاير و يطفي فيها و ايده بتترعش من الضغط العالي و هو بيقراء الاجابات 🙈و وصل لسؤال فتح مصر لقيته بيقلي " مين الشيخ سلامه الهندي ده ؟! ده بيبيع مانجا؟! 🤔
ببص لاحمد عشان يدافع عني ده لسه مأكدلي المعلومه دي من شويه لقيته بيضحك تلك الضحكه الخبيثه من تحت لتحت و لسان حاله بيقول " والله ما في حد هندي غيرك " 😂 و عامل نفسه بيقرا من الكتاب بتاعه و مخبي وشه وهو بيضحك 😂
طبعا نهايه القصه دي دراميه😂 وانا مابحبش الدرامه فمش هكتبها 😂
#الدور_التاني_شقه_خمسه

عبير الليل ,تروووف ,أمير الليل معجبون بهذا

المصدر : منتديات عبق الياسمين

 

جميلتي سما الموج لو أمضيت عمري كله أعبر عن شكري لك ما أوفيتك حقك كالشمس أنت أحبك