الفول البيتى ‏

الفول البيتى انظف واامن بكتير

من فول المحلات لانى اكتشفت انهم بيحطوا عليه

مواد كيماويه عشان يستوى فى وقت قليل


يبقى ما فيش اضمن من فول البيت



طريقة تدميس الفول مش هتشتريه



من بره تانى على ضمانتى 😍😍










المقادير :


ربع ك فول تدميس
نص كوب فول مدشوش
ربع كوب عدس اصفر
طماطمايه صغيره
ليمونه صغيره شرايح
معلقه كبيره نشا
معلقه كبيره ممسوحه بيكينج بودر
معلقه كبيره زيت
الطريقه :
اغسلى الفول وحطى عليه ميه وسبيه يغلى يدوب يغلى اطفى وصفى الميه وحطى ميه تانيه مغليه
اغسلى العدس والفول المدشوش والطماطم والليمون وحطيهم معاه وقلبيه وضيفى البيكينج وقلبيهم واخر اخر معلقه الزيت ع الوش ومتقلبيش وحطيه فى الدماسه على نار هادئه جدااااا او سخان الدماسه
ملاحظات :
احسن طعم للفول بيكون فى الدماسه بس لو مفيش ممكن حله بس الومنيوم
الفول ميعديش نص الدماسه او الحله والميه توصل لتلات ارباع الدماسه
متفتحيش عليه قبل ساعتين ولو محتاج ميه زودى ميه مغليه مش بارده
متنقعيش الفول بيخليه عامل زى الفول النابت
البيكينج بودر بيخليه ناعم وزى الزبده وبياخد وقت اقل فى التسويه بكتير
الليمون بيحافظ عليه وميخليهوش يسود
معلقه الزيت بتخليه سايب مش مكلكع مهما بات عندك فى التلاجه
اخر حاجه لو عندك اطفال بيحبوا هما مية الفول اكتر م حبوب الفول نفسها بعد ما يستوى خااالص هاتى ٣ معالق بالظبط ميه م الحنفيه وقلبى فيهم معلقه النشا وضيفهم ع الفول وسبيه ربع ساعه زياده ع النار الهادئه زى ما هو..

أسيرة الموج معجب بهذا

المصدر : منتديات عبق الياسمين