فاتن حمامة

فاتن حمامة من الفنانات اللى ربنا رزقهم بأكتر من موهبة يمكن أغربها القدرة على حل المشكلات الزوجية .. تخيل شابه صغيرة تقعد معاك انت ومراتك تفهمك الصح من الغلط وتخليك وانت مصمم على انك تطلقها تاخدها بالاحضان وتقولها انتى اللى فيهم بالعند فيهم.. يا ام منة..

فاتن نفسها مكنتش تعرف القدرة دى فى نفسها لكن بدأت تلتفت لها لما فى يوم عملوا مسابقة فى المدرسة عن افضل واحدة تكتب موضوع تعبير عن التضحية .. ففاتن كتبت وقالت ان "الرجل العاشق لا يبذل التضحية الا اذا طُلبت منه ولكنه يبذلها الى اخر قطرة فى دمه بدون تفكير او تراجع .. اما المراة فانها تبذل التضحية فى سخاء دون ان يطلب منها احد ان تضحى اذا خفق قلبها".

المهم ان المدرس اللى بيقيم الموضوع اول ما قراه حس بخطورة الكلام المكتوب وقال ازاى بنت عندها 16 سنة تكتب الكلام ده.. ونقل الموقف برمته الى ابلة الناظرة اللى كونت لجنة تحكيم من المدرسات زى لجنة ذا فويس وتوب شيف للبت فى الأمر.. وتم استدعاء فاتن حمامة ووسمعوها كلام صعب .. مفاده "بطلى كتابة يا حبيبتى .. لا انتى لها ولا هى ليكي"..

لكن فاتن بتقول بدل ما احنى راسى للعاصفة وقفت ادافع عن رأيى فالست الناظرة قطعت الموضوع اللى كتبته فاتن قدام عنيها على امل انها تنهى الموقف..

هوب بنت من المدرسة راحت حكت لاختها الكبيرة اللى حصل مع فاتن واختها دى كان لها مشكلة لانها كانت متجوزة طالب فى الجامعة اصغر منها وبتصرف عليه وكان بيعاملها حلو اوي لحد ما خلص واشتغل فبدأت معاملته تتغير .. ففاتن الله يسترها لما سمعت القصة راحت للست دى وقالت لها جوزك كان بيحبك لما كان حاسس انه محتاج لك وهو دلوقتى عايز يحس انك محتاجة له .. فسيبى شغلك وخليه يحس ان الوقت جه عشان يتحمل هو كل حاجة وانه يضحى عشانك .. فالست عملت كده والمشكلة اتحلت وعاشت فى تبات ونبات ومش عارف بصراحة خلفوا صبيان وبنات ولا لا .. الست فاتن مقالتش..

طبعا مشكلة الست لما اتحلت فاتن اتشجعت انها تبقى مُصلحة اجتماعية تعالج مشاكل المحتاجين من المحبين والعاشقين، فكان لها صديقة معروفة بخفة دمها وفجأة بقت كئيبة أكتر من سخسوخ فى فيلم الكيف .. فراحت فاتن سألتها عن سبب الكآبة فقالت لها حبيت واحد وهو بيلاوعنى.. وفهمت فاتن من كلامها عنه انه بيلعب بيها.. فقالت لها طيب اكتبى له جواب وقولى له انا عندى حمي وبكرة هاجى اقابلك فى النادي من ورا اهلى .. وطبعا الواد مرحش وفهمت انه خاف على نفسه منها ..فنصحتها تبعد عنه، وبعدت البنت .. ورجعت البنت بعد ما اكتشفت الحقيقة المرة فرفوشة نعنوشة تعيش المرح والسعادة ولا قناة موجة كوميدي فى اول يوم لافتتاحها ..

وفى مرة تالته واحدة زميلتها راحت قالت لها الحقى يا فاتن.. جوز اختى عايز يطلقها .. ففاتن راحت لها البيت وسألتها عن سبب المشكلة فالست قالت لها انا بغير عليه بشكل جنونى ففاتن اللى يبارك لها قالت لها: هل تؤمنين ان زوجك يحبك ؟، فالست قالت :اه، فقالت لها فاتن : حلاص اذن لا محل لغيرتك.. فالرجل الذى يحب لا يمكن أن يخون .. واقتنعت الست ورجعت لجوزها وخلصت المشكلة والبركة فى الست فاتن.

المصدر : منتديات عبق الياسمين

 

الجميلة سما كل شئ تزينيه بحضورك حتى توقيعي صار افضل بوجودك ..كل الشكر من قلبي لسموك

اخي الغالي king بحجم السماء شكرا على اهدائك الذي اكسب يومي فرحة ..لا حرمني الله من ابداعك

اخي الغالي king شكرا من كل قلبي على اهدائاتك الجميلة لا حرمني الله منك