من طالع برجى الروحانى ** مكتوب على كفى وجبينى
وسطور البن ف فنجانى ** أنا ليكى وحتماً ح تجينى
ماتحاوليش تختلقى ظروف ** وتخلى المجهول معروف
وتحاربى الممكن والساكن ** و تشردى قلبى اللى ما ساكن
وتهدهدى جنته بحروف ** يمكن . حاول . جايز . لكن
ما انا راسم رسمك تكوينى
تاهت حيرتى و شوفت سفينتى ** فى بحور غدرك ولا يوم هونتى
قلت اعافر برضه ح اسافر ** واوصل على شطك واتاخر
جنب قوارب نقشت صورتى ** شفت الموج غضبان مش قادر
يحكى اسرارك حاله كاوينى
قلت احاول واضرب رملك ** واسأل كاهن يكشف جهلك
تمتم قال مش ممكن ياابنى ** فى هنا شهقة ف حلقك . صابنى
وغيامة ف لياليك تندهلك ** قبل ماتبعد .. رد وجابنى
جيت وحكيت همى مكفينى