الضيقه اللي بقلبك مالها داعي

فرد جناح السعـاده فـلْ حاجبهـا ** الضيقه اللي بقلبـك مالهـا داعـي

ساعات دمع المحاجر ما يعذربهـا ** والعين من كحلها ما هيب ترتاعـي

قد لي شهورن على عمري مصعبها ** كن الزعل غيمتي والضيق مرباعي

أسج فكري و أدوج الرجل وأشعبها ** مرات واعي ومرّه مانـي بواعـي

أضرب مع الناس خانه كنت شاطبها ** لا علّها ما تنقّض باقـي اوجاعـي

اصد عن طاري الذكرى واجنبهـا ** لكنّها وسط جوفي بين الاضلاعـي

إن جيت أبي أنسى تِذَكّرني مراكبها ** وشوق المواني يحن لفلة شراعـي

حتى نسيم الشواطي مـن هبايبهـا ** لحن المفارق يجره داخل أسماعـي

يشقيني الصوت والدنيـا مجربهـا ** الآمال غابت ومنها قلّت اطماعـي

تشبهني الشمس لاجا وقت مغربهـا ** تغيب واغيب وافقد نور واشعاعـي

لحظة غروب المشاعر كنت حاسبها ** لحظه! ومرت سنه وحسابنا ضاعي

ما عاد يمدي السعاده يـا معذبهـا ** فات القطار وتوقف بيننـا الساعـي

حزن الملامح بقى للعيـن حاجبهـا ** من قال لك ضيقتي ماكن لها داعي ؟

راقت لي

سما الموج ,السيف ,تروووف ,جازلك غيري معجبون بهذا

المصدر : منتديات عبق الياسمين